देशलाई माया गर्नुहुन्छ भने हलोमा मतदान गर्नहोस्ः अध्यक्ष लिङ्देन

२५ वैशाख, हेटौँडा । राष्ट्रिय प्रजातन्त्र पार्टी (राप्रपा) का अध्यक्ष राजेन्द्र लिङ्देनले देशलाई माया गर्ने हो भने राप्रपाको चुनाव चिन्ह हलोमा मतदान गर्न आग्रह गर्नुभएको छ ।
राप्रपा मकवानपुरले हेटौंडामा आयोजना गरेको चुनावी सभालाई सम्बोधन गर्दै उनले नेकपा एमाले, माओवादी, नेपाली कांग्रेसका कार्यकर्ताहरुलाई देश समृद्ध बनाउने चाहना भएमा हलोमा मतदान गर्न आग्रह गर्नुभएको हो । देश सुधार्नको लागि सबै सुध्रिन जरुरी भएको र अब सबै दलहरु सुध्रन जरुरी भएको उहाँले बताउनुभयो । ‘यो निर्वाचनलाई देशलाई दुर्घटनामा जान रोक्ने अवसरको रुपमा प्रयोग गर्नुपर्छ,’ उनले भने ‘यो चुनावमा उनीहरुको बाकस खाली गरिदिनुस् ।’ सबै मिलेर अन्य दलको बाकस नै खाली गरिसकेपछि सबै दलका नेताहरु सुध्रिने अध्यक्ष लिङदेनको भनाई थियो ।

यस्तै चुनावीसभालाई सम्बोधन गर्नुहुँदै राप्रपाबाट हेटौंडाको मेयरको उम्मेद्वार दिपकबहादुर सिंहले आफुलाई मेयरमा जिताए भ्रष्टचार अन्त्य गर्ने उद्घोष गर्नुभयो । उहाँले हेटौंडामा स्वास्थ्य क्षेत्रमा निकै ठूलो समस्या रहेको बताउँदै आफु मेयरमा विजयी भए विशेषज्ञ सेवा सहितको सुविधायुक्त अस्पताल निर्माण गर्ने प्रतिबद्धता व्यक्त गर्नुभयो । उहाँले आफु र जनताको गठबन्धन भएको भन्दै यसपटकको मेयरमा आफु जित्ने र भ्रष्टचारको गठबन्धन पराजित हुने दाबी गर्नुभयो ।