लागुऔषध गाँजासहित दुई छुट्टा–छुट्टै स्थानबाट ५ जना पक्राउ

१४ चैत्र, हेटौँडा । मकवानपुर प्रहरीले लागु औषध गाँजा सहित पाँच जनालाई पक्राउ गरेको छ ।
प्रहरीले दुई छुट्टा–छुट्टै स्थानबाट २ क्विन्टल ६५ केजी ८ सय ग्राम लागूऔषध गाँजा, पिकअप गाडी सहित ५ जना पक्राउलाई गरेको हो । जिल्ला प्रहरी कार्यालय मकवानपुर र प्रहरी चौकी चौकीटोल मकवानपुरबाट खटिएको प्रहरी टोलीले भैसेबाट हेटौंडातर्फ आउदै गरेको प्र. ३–०१–०२३ च ५६४० नं.को पिकअप गाडीलाई प्रहरी चौकी चौकीटोलको कार्यालय अगाडी रोकी चेकजाँच गर्ने क्रममा लुकाई छिपाई ल्याएको अवस्थामा १ सय ६५ किलो ८ सय ग्राम गाँजा बरामद गरेको थियो । प्रहरीले गाँजा र गाडीसहित हेटौंडा१३ पदमपोखरी बस्ने २८ वर्षीय अरबिन्द नेपालीलाई नियन्त्रणमा लिएको छ ।

त्यस्तै ईलाका प्रहरी कार्यालय मनहरीले एक सय किलो गाँजा सहित चार जनालाई पक्राउ गरेको छ । गस्ती गर्ने क्रममा प्रहरीले मनहरी गाउँपालिका वडा नं. ६ स्थित लोथर खोला हुँदै खयरघारी तर्फ शंकास्पद रुपमा पिढ्युमा भारी बोकी आईरहेको अवस्थामा गाँजा सहित चारै जनालाई नियन्त्रणमा लिएको हो । पक्राउ पर्नेमा धादिङ रोराङ्ग गाउँपालिका वडा नं. २ बस्ने वर्ष ३० को मान बहादुर चेपाङ्ग, वर्ष ३९ को सन्त बहादुर चेपाङ्ग, मकवानपुर मनहरी गाउँपालिका वडा नं. ३ बस्ने वर्ष ५३ को बुद्धी बहादुर थिङ्ग र चितवन राप्ती नगरपालिका वडा नं. ११ बस्ने वर्ष ५५ को सञ्च बहादुर थिङ्ग रहेका छन् । उनीहरुले बोकेको बोरा चेकजाँच गर्दा एकसय किलो गाँजा फेला परेको प्रहरीले जनाएको छ । लागुऔषध गाँजा सहित नियन्त्रणमा लिई थप अनुसन्धान भईरहेको जिल्ला प्रहरी कार्यालय मकवानपुरले जनाएको छ ।