कांग्रेस मकवानपुरको सभापतिमा बुद्ध लामा चयन

१७ फागुन, हेटौँडा । नेपाली कांग्रेस मकवानपुरको सभापतिमा बुद्ध लामा सर्वसम्मत् चयन भएको छ ।
प्रमुख निर्वाचन अधिकृत गोपी शर्मा सुवेदीले सभापतिको प्रमाण पत्र प्रदान गर्दै लामा सभापति भएको घोषणा गर्नुभएको हो । दोस्रो चरणमा निर्वाचन हुने भएकाले प्रत्यासी आनन्दराम पराजुली र लामाबीच सहमति भएपछि दोस्रो स्थान भएका पराजुलीले लामालाई समर्थन गर्नुभएको थियो । सभापति निर्वाचित भएसंगै प्रमाणपत्र बुझ्दै सभापति लामाले सबैलाई समेटेर अघि बढ्ने बताउनुभयो । आन्तरिक प्रतिष्पर्धाको चरण सकिएको भन्दै उहाँले आगामी दिनमा संगठन सुदृढीकरण र आगामी चुनावी अभियानमा अघि बढ्ने प्रतिबद्धता व्यक्त गर्नुभयो ।
यस्तै कार्यक्रममा सभापतिका प्रत्यासी आनन्दराम पराजुलीले यो जित मकवानपुर कांग्रेसको भएको प्रतिक्रिया दिनुभयो । उहाँले तीन जना सभापतिलाई बराबर मतदान गर्ने मतदातालाई धन्यवाद दिदैं आगामी दिनहरुमा सबै एकजुट भई मिलेर सहकार्य गर्दै अघि बढ्ने बताउनुभयो ।
सोमबार भएको पहिलो चरणको मतदानमा बुद्ध लामाले ५ सय ९२ मत प्राप्त गर्दा आनन्दराम पराजुलीले ५ सय ४५ मत र जयराम लामिछानेले ५ सय ३१ मत प्राप्त गरेका थिए ।