१ सय १० किलो गाँजासहित राक्सीराङका प्रजा पक्राउ

१८ माघ, हेटौँडा । मकवानपुर प्रहरीले १ सय १० किलो लागुऔषध गाँजासहित एक जनालाई पक्राउ गरेको छ ।
पक्राउ पर्नेमा राक्सिराङ गाउँपालिका वडा नम्बर ५ का ३६ वर्षीय राम कुमार प्रजा रहेको मकवानपुर प्रहरीले जनाएको छ । ईलाका प्रहरी कार्यालय मनहरीबाट खटिएको प्रहरी टोलीले गस्ती गर्दै जाने क्रममा राक्सिराङ–५ स्थित सडकखण्डमा शंकास्पद रुपमा भारी बोकी हिँडिरहेका प्रजालाई सुरक्षाजाँच गर्दा गाँजा फेला परेको मकवानपुरका प्रहरी प्रवक्ता जयश्वर रिमालले जानकारी दिनुभयो । प्रजालाई लागुऔषध गाँजासहित नियन्त्रणमा लिई थप अनुसन्धान भइरहेको प्रहरी प्रवक्ता रिमालले जानकारी दिनुभयो । उक्त गाँजा ओसारपसारमा संलग्न रहेका अन्य व्यक्तिहरुको पनि खोजतलास कार्य भइरहेको उहाँले बताउनुभयो ।