टोल स्तरीय फुटबल प्रतियोगिताको उपाधि ज्ञान ज्योतिलाई

१८ कात्तिक, हेटौँडा । पदम कुमारी राउत स्मृती प्रतिष्ठानको आयोजनामा भएको दोस्रो टोल स्तरीय पुरुष फुटबल प्रतियोगिताको उपाधि ज्ञान ज्योति युवा क्लब लक्ष्मीपुरले जितेको छ ।
बिहिबार हेटौंडा उपमहानगरपालिका वडा नं. १७ हटियामा सम्पन्न फाइनल खेलमा प्रगतिशील युवा क्लबलाई १–० गोलअन्तरले हराउँदै ज्ञान ज्योति युवा क्लबे उपाधि जितेको हो । निकै रोमाञ्चक बनेको खेलको पहिलो हाफ गोलरहित बराबरीमा सकिएको थियो तर दोश्रो हाफको २६ औं मिनेटमा ज्ञान ज्योतिका सविन राईले गरेको गोल नै निर्णायक बन्यो । उपाधिसंगै ज्योति युवा क्लबले नगद तीस हजार सहीत शिल्ड, मेडल प्राप्त गरेको छ भने उपबिजेता बनेको प्रगतिशील युवा क्लबले नगद २० हजार सहित शिल्ड, मेडल प्राप्त गरेको छ । बिजेता तथा उपबिजेता टोलीहरुलाई बागमती प्रदेशकी सामाजिक विकास मन्त्री कुमारी मोक्तानले पुरस्कार प्रदान गर्नुभएको थियो । प्रतियोगितामा १३ टिमले सहभागिता जनाएको थियो । प्रतियोगिताको समापन कार्यक्रममा जिल्ला खेलकुद विकास समिति मकवानपुरका अध्यक्ष सानु लामा, प्रतिष्ठानका अध्यक्ष शंकर राउत लगायतको उपस्थिति रहेको थियो ।