एक क्विन्टल गाँजा सहित मकवानपुरमा ३ जना पक्राउ

४ जेठ, हेटौँडा । मकवानपुर प्रहरीले एक क्विन्टल लागुऔषध गाँजा, ट्रक सहित ३ जनालाई पक्राउ गरेको छ ।
पक्राउ पर्नेहरुमा ट्रक चालक काभ्रे महाभारत गाउँपालिका वडा नं. ५ बस्ने ४९ वर्षीय आइते बहादुर ठाडामगर, भिमफेदी गाउँपालिका ९ बस्ने ४१ वर्षीय ऐक्ला भन्ने राज कुमार तामाङ र कैलाश गाउँपालिका १० बस्ने ३६ वर्षीय सविन भन्ने सुबिन रुम्बा रहेको छ । जिल्ला प्रहरी कार्यालय मकवानपुरबाट खटिएको टोलीले हेटौंडा उपमहानगरपालिका १ स्थित सडकखण्डमा ना २ ख ९८६२ नम्बरको ट्रकलाई रोकेर चेक गर्दा १७ वटा पोकामा लुकाई छिपाई ल्याएको अवस्थामा उक्त परिमाणको गाँजासहित तीन जनालाई पक्राउ गरेको प्रहरी नायब उपरिक्षक जयश्वर रिमालले जानकारी दिनुभयो । पक्राउ परेका मध्ये राजकुमार र सुबिन गाँजा ओसारपसारमा संलग्न व्यक्ति भएको उपरिक्षक रिमालले बताउनुभयो । पक्राउ परेका तीनै जनामाथि आवश्यक अनुसन्धान र कारवाहीको प्रक्रिया भइरहेको प्रहरीले जनाएको छ ।