३४ केजी गाँजासहित पर्साका उपाध्याय भीमफेदीमा पक्राउ

१६ वैशाख, हेटौंडा । मकवानपुर प्रहरीले ३४ केजी लागूऔषध गाँजासहित एक जनालाई पक्राउ गरेको छ ।

पक्राउ पर्नेमा पर्सा जिल्लाको बिन्दावासिनी गाउँपालिका वडा नम्बर ३ बस्ने २९ वर्षीय रबिन्द्र उपाध्याय रहेको छ । विशेष सूचनाको आधारमा प्रहरी चौकी भैंसे मकवानपुरबाट प्रहरी सहायक निरीक्षक प्रभु राउत कुर्मीको कमाण्डमा खटिएको प्रहरी चेकीङ टोलीले बिहिबार भीमफेदी गाउँपालिका वडा नम्वर १ सुन्दरीमाईस्थित राप्तीखोलाको बगरबाट उक्त परिणामको लागूऔषध सहित पक्राउ गरेको जिल्ला प्रहरी कार्यालय मकवानपुरका प्रहरी निरीक्षक अविनाश अधिकारीले जानकारी दिनुभयो । पालुङबाट भैंसे हुँदै हेटौँडातर्फ आउदैं गरेको ना १ ज ४७३३ नम्वरको सुमो भीमफेदी–२ स्थित रोकी चेकजाच गर्नलाई रोक्न खोज्दा नरोकी तीब्र गतिमा भगाएको र उक्त सुमोको पिछा गर्दै आउने क्रममा भीमफेदी–१ सुन्दरीमाईस्थित राप्तीखोलाको बगरमा फेला पारेको प्रहरी निरीक्षक अधिकारीले बताउनुभयो । उक्त सुमो र गाँजासहित पक्राउ परेका उनीमाथि आवश्यक अनुसन्धानका साथै कानूनी कारबाही अगाडि बढाइएको मकवानपुर प्रहरीले जनाएको छ ।