जेष्ठ पत्रकारलाई मासिक रुपमा पेन्सन बितरण गर्ने काम सुरु

९ चैत्र, हेटौंडा । नेपाल पत्रकार महासंघ मकवानपुर शाखाले जेष्ठ पत्रकारलाई मासिक रुपमा पेन्सन बितरण गर्ने काम सुरु गरेको छ ।
महासंघ मकवानपुर शाखाले सोमबार पेन्सन वितरण शुभारम्भ कार्यक्रमको आयोजना गर्दै वितरणको काम सुरु गरेको हो । कार्यक्रमका प्रमुख अतिथी हेटौंडा उपमहानगरपालिकाका मेयर हरि बहादुर महतले मकवानपुर शाखाका पूर्व अध्यक्ष नबराज शर्मालाई पेन्सन वापतको रकम वितरण गर्नुभयो । उहाँले यो पेन्सन कोषमा अरु पनि रकम थप गरिने बताउनुभयो । करिब ४० वर्ष सम्म पत्रकारिता गरेर निबृत्त जिवन बिताइरहनु भएका शर्मालाई चैत्र महिनाको ४ हजार रुपैयाँ पेन्सन वापत वितरण गरिएको हो । महासंघ मकवानपुर शाखामा आवद्ध हुनुभएका सदस्यहरु मध्ये जेष्ठ सदस्यको वृत्ति बिकास गर्नका लागि पेन्सन दिन सुरु गरिएको हो । लगातार कम्तिमा बीस वर्ष मुख्य पेसा पत्रकारिता गरेर सक्रिय पत्रकारिता छोडी बिश्राम लिइसकेपछी प्राप्त निबेदनका आधारमा पेन्सन रकम दिन सुरु गरिएको अध्यक्ष हुमागाईले बताउनुभयो । कार्यक्रममा ब्रोडकाष्टिङ एसोसीएसन अफ नेपालका उपाध्यक्ष उज्वल चौलागाई, नेपाल पत्रकार महासंघ मकवानपुरका पूर्व अध्यक्ष राममणि दाहाल, प्रेस चौतारी बागमती प्रदेशका सहसंयोजक प्रकास दाहाल, प्रेस सेन्टर बागमती प्रदेशका संयोजक सुनिल खड्का, प्रेस चौतारी मकवानपुरका संयोजक धर्मेन्द्र दाहाल लगायतकाको सहभागिता रहेको थियो । पत्रकार महासंघ मकवानपुरका उपाध्यक्ष कुमार अधिकारी (पोष्टराज)ले स्वागत गर्नुभएको कार्यक्रममा सचिब गणेश दर्पण अधिकारीले सञ्चालन गर्नुभएको थियो । आजैको कार्यक्रममा पत्रकार महासंघ मकवानपुरका कार्यसमितिका पदाधिकारी र सदस्यहरुलाई अध्यक्ष हुमागाईले मायाँको चिनो दिनु भएको छ ।