मौद्रिक नीतिको समीक्षाले पूरा गरेन बैङ्किङ क्षेत्रका माग : राष्ट्र बैङ्कको बदला कि तटस्थता ?
स्वर्णिम खबर
काठमाडौँ । नेपाल बैङ्कर्स संघले केही समय अघि राष्ट्र बैङ्कलाई पत्र लेख्यो । पत्रमा राष्ट्र बैङ्कले मौद्रिक नीतिमार्फत् गरेका केही व्यवस्थाहरु सच्याउन माग गरेको थियो ।
राष्ट्र बैङ्क तटस्थता कि बदला ?
बैङ्करहरुले अर्थ मन्त्रालयसँग सीधै डिल गरेको राष्ट्र बैङ्कले मन पराइरहेको थिएन । अर्थ मन्त्रालयबाट राष्ट्र बैङ्कलाई निर्देशन दिन लगाएर माग पूरा गर्न खोज्ने बैङ्करप्रति राष्ट्र बैङ्क रुष्ट रहेको संकेत यसअघि नै दिइसकेको थियो । सोही कारणले बैङ्कहरुका मुख्य दुई मागलाई राष्ट्र बैङ्कले बेवास्ता गरेको जस्तो देखिएको छ ।
तर बैङ्करहरु भने अहिले सम्बोधन नभए पनि तेस्रो त्रैमासको मौद्रिक समीक्षामार्फत् त्यस्तो माग सम्बोधन हुने विश्वास व्यक्त गर्छन् । बैङ्कर्स संघका अध्यक्ष भुवन दाहालले आफ्ना मागहरु अहिले नै पूरा गर्नुपर्ने खालको नभएर असार मसान्तसम्म पूरा भए हुने खालको भएको भन्दै चैतको समीक्षाले यसलाई सम्बोधन गर्ने विश्वास व्यक्त गरे ।
‘मौद्रिक नीतिको समीक्षा अहिले ३/३ महिनामा हुन्छ । हाम्रा मागहरु अहिले नै पूरा गरिहाल्नुपर्ने खालका पनि छैनन् । चैत ५ गतेभित्र नयाँ गभर्नर पनि आउँदै हुनुहुन्छ । नयाँ गभर्नर आएपछि माग सम्बोधन गर्नुहुन्छ भन्ने हामीलाई विश्वास छ,’ दाहालले रातोपाटीसँग भने ।
राष्ट्र बैङ्कले बैङ्कहरुलाई पेल्नेगरी मौद्रिक नीतिको समीक्षा गरे पनि बैङ्करहरु निराश भने भएका छैनन् । अर्का एकजना बैङ्करले भने – ‘गभर्नरज्यूले अब जाने बेलामा दीर्घकालिन महत्त्वको काम किन गर्ने भन्ने सोचेका कारण ती मागहरु यथावत राखिएको हुनसक्छ, माग सम्बोधन भएन भनेर हामीलाई कुनै गुनासो छैन ।’
