गायक सोमबहादुर लामा नगद ५० हजार सहित सम्मानित

२७ पुस, हेटौँडा । वासुदेव रिजाल स्मृति प्रतिष्ठान मकवानपुरले गायक सोमबहादुर लामालाई सम्मान गरेको छ ।
शनिबार हेटौंडा उपमहानगरपालिकाकी नगर प्रमुख मिनाकुमारी लामाको प्रमुख आतिथ्यतामा एक औपचारिक कार्यक्रमको आयोजना गरी प्रतिष्ठानले लामालाई नगद ५० हजार रुपैंया सहित सम्मान गरेको हो । सम्मानित लामा अशक्त अवस्थामैँ कार्यक्रममा उपस्थिति हुनुहुन्थ्यो ।
लामाले आफ्नै शब्द र स्वरमा भ्यागुतोलाई स्टकोट गीत रेकर्ड गराउनुभएको हो । त्यसैगरी कार्यक्रममा समाजसेवी कृष्णप्रसाद नेपाललाई नगद १५ हजार रूपैयाँ राशिबाट सम्मानित गरिएको थियो । प्रतिष्ठानका अध्यक्ष आरसी रिजालको सभाध्यक्षतामा कार्यक्रम सम्पन्न भएको हो ।
यसैबीच प्रतिष्ठानले वासुदेव रिजाल स्मृति ग्रन्थ प्रकाशन गरी विमोचन समेत गरेको थियो । पुस्तकलाई साहित्यकार तथा सम्पादक निमेष निखिलले सम्पादन गर्नु भएको हो । स्मृति ग्रन्थमा विभिन्न क्षेत्रका व्यक्तित्वहरूद्वारा लिखित तथा सञ्चालित ३१ लेख रचनाहरू समावेश छन् । कार्यक्रममा स्व. वासुदेव रिजालको व्यक्तित्व तथा योगदान बारे सहभागीहरुले चर्चा गरेका थिए ।
कार्यक्रममा सिस्नुपानी नेपाल मकवानपुरका अध्यक्ष संप्रस पौडेल र निवर्तमान अध्यक्ष राजकुमार लामिछानेले हास्यव्यङ्ग्य रचना वाचन गर्नुभएको थियो । कार्यक्रमको सहजीकरण प्रतिष्ठानकी सचिव अनिता न्यौपानेले गर्नुभएको थियो ।