मउवा संघ निर्वाचनः अनिल अग्रवालको प्रतिबद्धता पत्र सहित प्यानल घोषणा

२२ पुस, हेटौँडा । पुस २७ गते हुने मकवानपुर उद्योग वाणिज्य संघको निर्वाचनमा अध्यक्ष पदका उम्मेदवार अनिल अग्रवालले आफ्नो प्यानल घोषणा गर्नुभएको छ ।
सोमबार साँझ व्यवसायीहरुको भेलामा उहाँले आफ्नो प्रतिबद्धता पत्र सहित सिंगो प्यानल सार्वजनिक गर्नुभएको हो । अग्रवालको वाणिज्य तर्फको उपाध्यक्षमा राजु अधिकारी, एशोसियटतर्फ विष्णु खनाल, उद्योग तर्फ रविन्द्र प्रसाद घिमिरे र वस्तुगत तर्फ काव्यमणि अधिकारीको उम्मेदवारी परेको छ ।
कार्यक्रममा बोल्दै अध्यक्ष पदका उम्मेदवार अग्रवालले संघको मूलभूत उद्देश्य र भूमिकामा व्यवसायीको हकहितको संरक्षण गर्ने, स्थानीय उत्पादनको प्रवद्र्धन गर्ने, संघको संस्थागत विकास गर्ने, आर्थिक मन्दीको प्रभाव कम गर्ने पहल गर्ने प्रतिबद्धता व्यक्त गर्नुभयो ।
आन्तरिक राजस्व कार्यालयको परिसरमा परामर्श केन्द्र स्थापना गरी व्यवसायीहरूलाई कर प्रणालीबारे जनचेतना अभिवृद्धि गरिने समेत उहाँले बताउनुभयो ।
भीमफेदी कुलेखानी सुरुङ्ग मार्ग बनाउन पहल गर्ने र इन्द्रसरोवरलाई नैनीतालको रुपमा विकास गर्न पहल गर्ने समेत अग्रवालको प्रतिबद्धता रहेको छ ।
टिम घोषणा कार्यक्रममा चर्चित गायक बद्री पंगेनीले आफ्नो सांगीतिक प्रस्तुती समेत दिएका थिए । कार्यक्रममा संघका पूर्व अध्यक्षद्वय राजकुमार न्यौपाने, भूवनलाल श्रेष्ठ, भगिरथी शर्मा, हेटौँडा २ का वडा अध्यक्ष विष्णुगोपाल महर्जन लगायत संघमा आवद्ध विभिन्न वस्तुगत संघका अध्यक्षहरुको आतिथ्यता रहेको थियो ।