मउवा संघ निर्वाचनः प्रतिबद्धता पत्र सहित प्रमोद सिंह रानाभाटको टिम सार्वजनिक

२१ पुस, हेटौँडा । मकवानपुर उद्योग वाणिज्य संघको पुस २७ गते हुने निर्बाचनमा अध्यक्ष पदका प्रत्यासी प्रमोद सिंह रानाभाटले पुर्ब अध्यक्षहरुको उपस्थितीमा प्रतिबद्धता पत्र सहित आफ्नो टिम सार्बजनिक गर्नुभएको छ ।
रानाभाटको वाणिज्य तर्फको उपाध्यक्षमा राम प्रसाद न्यौपाने, एशोसियट तर्फ उज्वल चौलागाई, उद्योग तर्फ दिपक उप्रेती र बस्तुगत तर्फ प्रदिप अर्यालको उम्मेद्वारी रहेको छ । महासचिवमा प्रतिमा श्रेष्ठ, कोषाध्यक्षमा श्री कृष्ण कर्माचार्यको उम्मेद्वारी छ । एशोसियटतर्फ सदस्यमा टीम टेलिभिजनका अध्यक्ष नबराज खतिवडाको समेत उम्मेदवारी रहेको छ ।
कार्यक्रममा बोल्दै अध्यक्षका उम्मेद्वार रानाभाटले व्यवसायीहरुको अहित हुनेगरी मेला आयोजना नगर्ने प्रतिबद्दता ब्यक्त गर्नुभएको छ । ब्यबसायीको हित हुनेगरी एक्स्पो आयोजना गर्ने, स्थानीय तहसंगको सम्बन्ध सुधार गर्ने, सदस्यता शुल्क घटाउने, हेटौंडामा स्वास्थ्य सेवामा सुधार ल्याई ब्यवसायीको उपचार सेवामा सहयोग गर्ने, सरकारी कार्यालयहरुसंग समन्वय गर्ने लगायतका प्रतिबद्दता सार्बजनिक गर्नुभएको छ ।
प्रदेश सरकारसंग समन्वय गरी प्रदेश विश्वविद्यालय स्थापनामा भुमिका खेल्ने उहांको प्रतिबद्दता छ । आपतकालिन कोष स्थापना गरी ब्यबसायीलाई सहयोग गर्ने समेत उहाँले बताउनुभयो । पर्यटन क्षेत्रको बिकास सहित पेशागत मर्यादा र सुरक्षाको प्रत्याभुती दिलाउने उहाँले दाबी गर्नुभयो ।