चितवन राइनोजको विजयी सुरुवात

१७ मंसिर, काठमाडौँ । नेपाल प्रिमियर लिग (एनपीएल) मा चितवन राइनोजले विजयी सुरुवात गरेको छ ।
सोमबार भएको पहिलो खेलमा काठमान्डु गुर्खाजलाई ५ विकेटले पराजित गर्दै चितवनले बिजयी सुरुवात गरेको हो । काठमाडौंले दिएको १ सय १२ रनको लक्ष्य चितवनले १७ ओभर खेल्दै ५ विकेट गुमाएर पूरा गरेको हो ।
चितवनका लागि सन्तोष कार्कीले अविजित रहँदै सर्वाधिक २८ रन बनाए । उनले ३१ बल खेल्दै २ चौका र १ छक्का प्रहार गरे । त्यस्तै शरद भेषावकर पनि ११ रनमा अविजित रहे । काठमाडौँको लागि शाहब आलमले ३ विकेट लिएपनि चितवनलाई जितबाट रोक्न पर्याप्त भएन ।
त्यसअघि सोहेल तनविरले ५ विकेट लिएपछि टस हारेर पहिले ब्याटिङ गरेको काठमाडौँले २० ओभरमा ९ विकेट गुमाएर १ सय ११ रन बनाएको थियो । काठमाडौंका सुमित महर्जनले २९ र माइकल लेभिटले २५ रन बनाएका थिए । चितवनका सोहेल तनविरले ४ ओभरमा २१ रन खर्चेर ५ विकेट लिएका थिए ।