पहिरोमा परी एन्फा एकेडेमीका ६ छात्र सम्पर्कविहिन

१२ असोज, हेटौँडा । वर्षाका कारण आएको पहिरोले मकवानपुरको इन्द्रसरोवर गाउँपालिका वडा नं–३ स्थित एन्फा एकेडेमीका ६ छात्र सम्पर्कविहिन रहेका छन् ।
वल्सलादेवी मावि (एन्फा एकेडेमी) मा अध्ययनरत ६ जना छात्र वेतत्ता भएको विद्यालय व्यवस्थापन समितिका अध्यक्ष सुवासचन्द्र ठकुरीले जानकारी दिनुभयो । कुलेखानी जलाशयका कारण आएको बाढी विद्यालय डुबानमा पर्ने डरले सुरक्षित स्थानमा सार्दै गर्दा टेकर भन्ने स्थानमा अचानक आएको पहिरोमा ती छात्रहरु पुरिएको स्थानीय सन्तोष बाँनियाले जानकारी दिनुभयो ।
वेपत्ता हुनेमा अनुपम घलान, प्रियाँक आचायर्, विकल रेग्मी आदित्य बलमंपाखी, विवस बाँनिया र साइमन योन्जन रहेका छन् । उद्धारका लागि नेपाली सेना, नेपाल प्रहरी, शसस्त्र प्रहरी घटनास्थल तर्फ जाँदै गरेको इन्द्रसरोवर गाउँपालिकाका अध्यक्ष श्रीकृष्ण पुडासैनीले जानकारी दिनुभयो ।
छात्रावासमा १३ वर्ष उमेर समूहका ४० जना बालकहरु गत जेठ महिनादेखि बन्द प्रशिक्षणमा थिए । ३४ जनालाई सुरक्षित स्थानमा सारिएको विद्यालयका शिक्षक सुदर्शन घिमिरेले जानकारी दिनुभयो ।