कांग्रेसको प्रस्तावमा अरु राजनीतिक दल सहमत नहुँदा संघीयतामाथि प्रश्न उठ्योः मुख्यमन्त्री लामा

२५ भाद्र, हेटौँडा । बागमती प्रदेशका मुख्यमन्त्री बहादुर सिं लामाले संविधान निर्माणको क्रममा प्रमुख राजनीतिक दलहरु चुकेको बताउनुभएको छ ।
संघीयतालाई कम खर्चिलो गर्ने कांग्रेसको प्रस्तावमा अरु राजनीतिक दलहरु सहमत हुन नसकेको उहाँको भनाई छ । संविधान निर्माणको क्रममा प्रदेशको संख्या निर्धारण गर्ने सवालमा राजनीतिक दलहरुबीच ठुलो बहस भएको उहाँले बताउनुभयो ।
जिल्ला समन्वय समिति मकवानपुरको १० औं जिल्ला सभामा बोल्नुहुँदै मुख्यमन्त्री लामाले ५ वटामात्र प्रदेशको प्रस्ताव राख्दा कांग्रेसलाई संघीयता विरोधी पार्टी भनेर आरोप लागेको समेत बताउनुभयो । अहिले संघीयतामाथि उठेको प्रश्न पनि त्यसैको परिणाम भएको उहाँको बुझाई छ ।
मुख्यमन्त्री लामाले जिल्ला समन्वय समितिले अझै पनि अधिकार प्राप्त गर्न नसकेको जिकिर गर्नुभयो । स्थानीय तहलाई नियन्त्रणमा राख्न समन्वय समिति चाहिन्छ भन्ने कांग्रेसकै अडानका कारण समन्वय समितिको व्यवस्था भएको मुख्यमन्त्री लामाले दाबी गर्नुभयो ।

यसैगरी मुख्यमन्त्री लामाले संविधान संशोधन अनुसन्धानको विषय बन्नुपर्ने बताउनुभयो । अनुसन्धान बिना संविधान संशोधन हुँदा झन विवादित हुने उहाँको भनाई छ । मुख्यमन्त्री लामाले प्रदेशको औचित्यलाई पनि पुष्टि गर्ने गरी संविधान संशोधन गर्नुपर्नेमा समेत जोड दिनुभयो । प्रादेशिक संरचनाबाट केही सुुधारहरु भएपनि जनताको आकांक्षा अनुसार अझै पनि सुधार हुन नसकेको मुख्यमन्त्री लामाको भनाई छ ।
मुख्यमन्त्री लामाले सुशासन कायम हुने गरी र जनताले प्रत्यक्ष अनुभुति गर्ने गरी काम गर्न पनि स्थानीय तहलाई आग्रह गर्नुभयो ।