सोमबारबाट राष्ट्रिय भेट्रान्स फुटबल प्रतियोगिता–२०८१ सुरु हुँदै

२३ भाद्र, हेटौँडा । सोमबार (भोली) बाट सुरु हुने तेस्रो रोटरी मकवानपुर पिप्ले क्याम्पा राष्ट्रिय भेट्रान्स फुटबल प्रतियोगिता–२०८१ को तयारी पूरा भएको छ ।
भदौ २४ गतेदेखि ३१ गतेसम्म हेटौँडा –५ स्थित पिप्ले क्याम्पा रंगशालामा आयोजना हुने भेट्रान्स फुटबल प्रतियोगिताको सम्पूर्ण तयारी पूरा भएको आयोजक रोटरी क्लब अफ मकवानपुरले जनाएको छ ।
उद्घाटन खेलमा नागस्वती भेट्रान्स क्लव हेटौंडा र चितवन भेट्रान्स क्लव चितवनबिच प्रतिस्पर्धा हुने रोटरीका अध्यक्ष अनिल अग्रवालले जानकारी दिनुभयो । प्रतियोगितामा देशका विभिन्न स्थानका १५ वटा भेट्रान्स क्लबहरुले प्रतिस्पर्धा गर्ने उहाँले बताउनुभयो ।
जलन प्राथमिक उपचार केन्द्र स्थापनाका लागि सहयोग जुटाउने उद्देश्यले हुन लागेको प्रतियोगिताको उपाधि विजेताले २ लाख २ हजार २ सय २२ रुपैयाँ प्राप्त गर्नेछ भने उपबिजेताले १ लाख १ हजार १ सय ११ प्राप्त गर्नेछ ।
प्रतियोगिता सञ्चालनका लागि १६ लाख लाग्ने आयोजकको अनुमान छ । पिप्ले युवा क्लव र रोट्रयाक क्लब अफ मकवानपुरको सहआयोजनामा प्रतियोगिता हुन लागेको हो ।