हेटौंडा ८ मा वडा स्तरीय टि–२० क्रिकेट प्रतियोगिता हुने

८ भाद्र, हेटौँडा । हेटौंडा उपमहानगरपालिका वडा नं. ८ मा वडा स्तरीय टि–२० क्रिकेट प्रतियोगिता हुने भएको छ ।
शनिबार पत्रकार सम्मेलन गर्दै एमालकोे जनवर्गीय संगठन नेपाल खेलकुद महासंघ वडा नं.८ को आयोजनामा भदौ २९ गते देखि असोज ५ गतेसम्म प्रतियोगिता हुन लागिएको जानकारी दिइएको हो । चन्द्रोदय माध्यमिक विद्यालयको खेल मैदानमा हुने प्रतियोगितामा १९ वटै वडाका २० देखि २२ वटा टिमहरुको सहभागिता रहने अनुमान आयोजकले लिएको छ । प्रतियोगितामा प्रथम हुने टिमलाई नगद ५० हजार, द्वितिय हुने टिमलाई नगद २५ हजार, उत्कृष्ट मार्च पास गर्ने क्रिकेट टिमलाई विविध पुरस्कार तथा प्रमाणपत्र वितरण गरिने खेल संयोजक धर्मराज पुडासैनीले बताउनुभयो ।
त्यस्तै उत्कृष्ट खेलाडी तथा लामो समय देखि खेल क्षेत्रमा लागेका व्यक्तित्वलाई सम्मान पत्र वितरण गरिने उहाँले बताउनुभयो । प्रतियोगिताको लागि नेकपा (एमाले) हेटौंडा–८ नं. वडा कमिटीको व्यवस्थापन तथा धर्मराज पुडासैनीको संयोजकत्वमा ३१ सदस्यीय क्रिकेट खेल संचालन तथा व्यवस्थापन मुल समिति र ५ वटा विभिन्न उपसमितिहरु समेत गठन गरिएको छ । खेल सम्पन्न गर्नलाई ३ लाख ५० हजार रुपैँया खर्च लाग्ने अनुमान गरिएको आयोजकले जनाएको छ । प्रत्येक किकेट टिमलाई ईन्ट्री शुल्क बापत रु. ५ हजार लाग्ने आयोजकले जनाएको छ ।