बागमती प्रदेश सरकारले तीन दिन गणतन्त्र दिवस मनाउने

११ जेठ, हेटौँडा । बागमती प्रदेश सरकारले तीन दिनसम्म विविधि कार्यक्रम गरी गणतन्त्र दिवस, २०८१ मनाउने भएको छ ।
शुक्रबार पत्रकार सम्मेलन गर्दै आन्तरिक मामिला तथा कानुन मन्त्रालयले जेठ १३, १४ र १५ गते गणतन्त्र दिवस मनाउन लागेको जानकारी दिएको हो । मुख्यमन्त्री शालिकराम जम्कट्टेलको संयोजकत्वमा ४२ सदस्यीय मूल समारोह समिति गठन गरिएको आन्तरिक मामिला तथा कानुन मन्त्री गंगानारायण श्रेष्ठले जानकारी दिनुभयो ।
गणतन्त्र दिवसका अवसरमा जेठ १३ गते सामाजिक विकास मन्त्रालयले गणतन्त्र दिवस सम्बन्धी विषयमा विद्यालयस्तरीय वक्तृत्वकला प्रतियोगिता आयोजना गर्ने र युवा तथा खेलकुद मन्त्रालय र खेलकुद परिषदले मैत्रीपूर्ण खेलकुद कार्यक्रम गर्ने भएका छन् । त्यस्तै, जेठ १४ गते स्वास्थ्य मन्त्रालयले सार्वजनिक रक्तदान कार्यक्रम, वन तथा वातावरण मन्त्रालयले वृक्षारोपण, सञ्चार रजिष्ट्रारको कार्यालयले नारायणी मलको एनएस सिनेमा हलमा लघु चलचित्र तथा वृत्तचित्र प्रदर्शन गर्ने र १५ गते गणतन्त्र दिवसको अवसरमा सम्बन्धित मन्त्रालय–कार्यालयहरुले आफ्नो परिसर सरसफाइ, प्रभातफेरी र मूल समारोहमा शैक्षिक संस्थाबाट शिक्षक तथा विद्यार्थीको सहभागिताका लागि हेटौँडा उपमहानगरपालिका मार्फत समन्वय गर्ने निर्णय भएको छ ।
त्यसैगरी १५ गते नै बिहान ७ः३० बजे हेटौंडाको भुटनदेवी माविको चौरमा भेला भई स्कुल रोड–बुद्धचोक–चौकिटोल–मानस चोक हुँदै मुख्यमन्त्री तथा मन्त्रिपरिषद्को कार्यालयको प्राङ्गणमा व्याण्ड बाजासहितको प्रभातफेरी गरिने छ ।
दिवसमा प्रदेशका सबै मन्त्रालयले आफ्नो कार्यालय परिसरमा राष्ट्रिय झण्डा फराउने, हेटौँडाको बुद्ध चोक र बसपार्कमा आन्तरिक मामिला तथा कानुन मन्त्रालयले झण्डा फराउने र जेठ १४, १५ र १६ गते सबै मन्त्रालय र निकायले आफ्नो वेबसाइटको हामपेजमा गणतन्त्र दिवस २०८१ भव्य रूपले मनाऔं लेखिएको ब्यानर डिस्प्ले गर्ने निर्णय भएको मन्त्री श्रेष्ठले जानकारी दिनुभयो ।
पत्रकार सम्मेलन कार्यक्रममा आन्तरिक मामिला तथा कानुनका सचिव पूर्ण बहादुर दर्जी, सञ्चार रजिष्ट्रार रेवती प्रसाद सापकोटा लगायतकाको उपस्थिति रहेको थियो ।