प्रदेश फुटबलको उपाधि कोशीलाई

२ वैशाख, हेटौंडा । बागमती प्रदेश खेलकुद विकास परिषद्को आयोजनामा पहिलोपटक सम्पन्न अन्तरप्रदेश राष्ट्रिय खेलकुद प्रतियोगिताअन्तर्गत फुटबलको उपाधि कोशी प्रदेशले जितेको छ ।
आइतबार प्रदेशको राजधानी हेटौँडा स्थित गौरीटार रंगशालामा भएको फाइनल भिडन्तमा बागमती प्रदेशलाई १–० गोल अन्तरले पराजित गर्दै कोशीले उपाधि उचालेको हो । कोशीको जितका लागी १७ नम्बरका निखिल तामाङले गोल गरेका हुन् । उनले खेलको ५४ औं मिनेटमा गरेको एकमात्र गोल निर्णायक बन्यो । निकै प्रतिस्पर्धात्मक बनेको खेलको पहिलो हाफ भने गोल रहित बराबरीमा सकिएको थियो ।
यसअघि फाइनलको यात्रा तय गर्ने क्रममा बागमतीले कर्णाली र कोशीले सुदुरपश्चिमलाई हराएका थिए । प्रतियोगितामा ७ प्रदेशको सहभागिता रहेको थियो । प्रतियोगिताको विजेता र उपविजेता टिमलाई कार्यक्रमका प्रमुख अतिथि एवं प्रदेशका मुख्यमन्त्री शालिकराम जम्कट्टेल, सामाजिक विकास मन्त्री कुमारी मोक्तान लगाएतले शिल्ड, मेडल तथा प्रमाणपत्र प्रदान गरेका थिए ।