खेलकुद विकास समिति मकवानपुरका अध्यक्ष खड्गीको सोमबार बिदाई

५ चैत्र, हेटौँडा । जिल्ला खेलकुद विकास समिति मकवानपुरका अध्यक्ष भेष खड्गीको बिदाई तथा सम्मान कार्यक्रम सोमबार भएको छ ।
हेटौंडा उपमहानगरपालिकाका मेयर मिनाकुमारी लामाको प्रमुख आतिथ्यता एवम् पूर्व मेयर हरिबहादुर महत, वडा अध्यक्षहरु, समितिका पूर्व अध्यक्ष चन्द्र लामा, नगर खेलकुद विकास समितिका पूर्व अध्यक्ष चन्द्र शाही लगायतको आतिथ्यतामा अध्यक्ष खड्गीको बिदाई भएको हो । बिदाई कार्यक्रममा मेयर लामाले खेलकुदको पूर्वाधार निर्माणको क्षेत्रमा खड्गीले उल्लेखीय भुमिका निर्वाह गरेको बताउनुभयो । खड्गीको कामले आगामी नेतृत्वलाई पनि दिशा निर्देश गरेको मेयर लामाको भनाई छ । समिति बाहिर रहेर भएपनि खेल क्षेत्रको विकासमा अनवरत लाग्न उहाँको सुझाव थियो ।
त्यस्तै अध्यक्ष खड्गीले खेलकुद सम्वद्ध संघसंस्थाहरुको साथ र सहयोगबाट नै आफु सफल भएको प्रतिक्रिया दिनुभयो । उहाँले अब आउने नेतृत्वले खेलाडीहरुको अस्तित्व रहने गरी खेलकुदका गतिविधिहरु अगाडि बढाउनुपर्ने बताउनुभयो । खेलकुद तथा व्यापार महोत्सवबाट संकलन भएको २० लाख रुपैयाँ अक्षय कोष मार्फत् खेल क्षेत्रको विकासमा लगाउने उहाँले बताउनुभयो । उक्त कोषमा खड्गीले आफ्ना पिताको नाममा वार्षिक ५० हजार थप गर्दै लैजाने प्रतिबद्धता जनाउनुभयो । कार्यक्रमलाई खड्गीलाई खेलकुदसंग सम्बन्धित विभिन्न संघसंस्थाले सम्मान समेत गरेको थियो । खड्गी २०७८ चैत्र ४ गते जिल्ला खेलकुद विकास समितिको अध्यक्षमा नियुक्त हुनुभएको हो ।