चैत्र २ गतेदेखि हेटौंडामा प्रदेश स्तरीय महिला उद्यमी प्रदर्शनी हुने

३० फागुन, हेटौँंडा । ८ औं प्रदेश स्तरीय महिला उद्यमी प्रदर्शनी २०८० हेटौंडामा हुने भएको छ ।
मकवानपुर उद्योग वाणिज्य संघको महिला उद्यमी विकास समितिले चैत्र २ गतेदेखि ६ गतेसम्म प्रदेश स्तरीय महिला उद्यमी प्रदर्शनी आयोजना गर्न लागेको हो । बुधबार हेटौंडामा पत्रकार सम्मेलन गर्दै समितिका सभापति अंकिता सुमार्गीले ११ वर्षपछि पर्यटन, कृषि, लघु उद्यमशीलता–महिला सहभागिता आजको आवश्यक्ता भन्ने नाराका साथ प्रदर्शनी गर्न लागिएको जानकारी दिनुभयो । समितिका सभापति सुमार्गीले प्रदर्शनीले महिलाहरुको उद्यमशीलताको प्रवर्द्धनमा टेवा पुग्ने अपेक्षा राखेको बताउनुभयो । प्रदर्शनीमा महिला उद्यमीहरुको हस्तकलाका उत्पादनहरु, अन्य वस्तु तथा सेवाहरुको प्रदर्शनी साथै कृषि सम्बन्धी स्टलहरु रहने उहाँले जानकारी दिनुभयो । हेटौंडाको पल्पसा सदनमा आयोजना हुने प्रदर्शनीमा ३७ वटा स्टलहरु रहने र मकवानपुर, सिन्धुली, चितवन, काठमाडौँ, नुवाकोट, ईटहरी देखिका उद्यमीहरुबाट स्टल बुक भएको समेत उहाँले जानकारी दिनुभयो । प्रदर्शनी स्थलमा प्रवेश शुल्क निःशुल्क गरिएको समेत उहाँले बताउनुभयो ।
प्रदर्शनी अवधीभर महिला उद्यमीहरुको बस्तु तथा सेवाहरुको प्रदर्शनी तथा बिक्री, कृषि उपजहरुको प्रदर्शनी तथा बिक्री, स्थानीय कलाकारहरुको दैनिक मनोरञ्जनात्मक प्रस्तुति, महिला उद्यमीहरुको सफलताको कथा प्रस्तुति, महिला उद्यमशीलता लगायतका विषयमा प्यानल छलफल, कृषि सम्बन्धी खुल्ला अन्तक्रिया कार्यक्रम हुनेछ । पत्रकार सम्मेलनमा मकवानपुर उद्योग वाणिज्य संघका अध्यक्ष कृष्ण कुमार गुप्ता, संघका पूर्व अध्यक्ष अरुणराज सुमार्गी, विभिन्न महिला उद्यमीहरुको उपस्थिती रहेको थियो ।