चैत्र २४ गतेदेखि मेयर कप फुटबल हुने

२९ फागुन, हेटौँडा । चौंथो संस्करणको मेयर कप फुटबल प्रतियोगिता आउँदो चैत्र २४ गतेदेखि सुरु हुने भएको छ ।
हेटौंडा उपमहानगरपालिकाको सहयोग तथा नगर खेलकुद विकास समितिको आयोजनामा हुने प्रतियोगिता हेटौंडा—५ स्थित क्याम्पा रंगशालामा हुने मंगलबार आयोजित पत्रकार सम्मेलनमा जानकारी गराइएको छ । खेलकुदको माध्यमबाट वडा–वडा बिचमा सुमधुर सम्बन्ध स्थापनाका लागि सञ्चालन हुने प्रतियोगितामा उपमहानगरका १९ वटा वडा सहभागी हुने नगर खेलकुद विकास समितिका अध्यक्ष रविन्द्र प्रसाद घिमिरेले जानकारी दिनुभयो । प्रतियोगितामा राष्ट्रिय टिममा आबद्ध नभएका खेलाडीलाई समावेश गराइने उहाँले बताउनुभयो । प्रतियोगितमा प्रथम हुने टिमले नगद दुई लाख, द्वितीय हुनेलाई एक लाख र तृतीय हुने टिमले ५० हजार प्राप्त गर्नेछन् ।
त्यसैगरी प्रतियोगितामा विधागत तर्फ सर्वोत्कृष्ट खेलाडीलाई नगद १० हजार प्रदान गरिनेछ । उत्कृष्ट किपर, प्रशिक्षक, उत्कृष्ट डिफेन्सलाई जनही पाँच–पाँच हजार प्रदान गरिने खेलकुद विकास समितिले जनाएको छ । प्रतियोगितामा सहभागी हुने टिमलाई चैत्र १५ गतेसम्म दर्ता समय तोकिएको छ ।