बागमती गोल्डकपमा मछिन्द्रको बिजयी सुरुवात

१ फागुन, हेटौँडा । छैठौं संस्करणको बागमती गोल्डकप फुटबल प्रतियोगितामा ए डिभिजन क्लब मछिन्द्रले बिजयी सुरुवात गरेको छ ।
बागमती गाउँपालिका ८ स्थित जनता माविको खेल मैदानमा भएको उद्घाटन खेलमा सर्लाहीको बागमती युथ क्लबलाई ५–२ गोलअन्तरले हराउँदै मछिन्द्रले बिजयी सुरुवात गरेको हो । मकवानपुर गोल्डकपमा सेमिफाइनल सम्मको यात्रा तय गरेको सर्लाही बागमती गोल्डकपमा पहिलो खेलमै पराजित हुँदै प्रतियोगिताबाट बाहिरिएको छ । खेलको सुरुमै हिसुप थपलियाको गोलबाट मछिन्द्रले अग्रता लिएको थियो ।
स्टार खेलाडी बिमल घर्ती मगरको उत्कृष्ट पासमा युसुरले हेड मार्फत गोल गरेका हुन् । त्यस्तै पहिलो हाफकै ४३ औं मिनेटमा अभिसेक गुरुङले गोल गर्दै मछिन्द्रको अग्रतालाई दोब्बर बनायो । खेलको दोश्रो हाफमा दुबै टोलीले आक्रमक खेल खेलेका थिए । मछिन्द्रका चिजोबाले खेलको ५७ औं र सौरभ लिम्बुले ८० औं मिनेटमा गोल गर्दै टोलीलाई ४–० को अग्रता दिलाएका थिए तर सर्लाहीका सुजन गुरुङले ८२ औं र श्रीजन गौतमले ८३ औं मिनेटमा गोल गर्दै टोलीलाई खेलमा फर्काउने प्रयास गरेका थिए । खेलको ८८ औं मिनेटमा मछिन्द्रका विमल घर्ती मगरले गोल गर्दै ५–२ को जीत सुनिश्चित गरे । खेलको म्यान अफ दि म्याच मछिन्द्रका विमल घर्ती मगर घोषित भए ।
प्रतियोगिता अन्तर्गत बुधबार हिमालयन शेर्पा क्लब र आयोजक बागमती खेलकुद विकास समिति बीच हुनेछ । १० वटा टोलीको सहभागिता रहेको प्रतियोगिताको विजेता टिमले नगद १० लाख र उपविजेताले ५ लाख रुपैयाँसहित ट्रफी र प्रमाणपत्र प्राप्त गर्ने छ ।