एनआरटी मकवानपुर गोल्डकपको फाइनलमा

२४ माघ, हेटौँडा । न्युरोड टिम (एनआरटी) हेटौंडामा जारी छैठौं संस्करणको सहिद स्मृति स्थानीय तह अन्तर्राष्ट्रिय फुटबल प्रतियोगिताको फाइनलमा प्रवेश गरेको छ ।
हेटौँडा ६ स्थित गौरीटार रंगशालामा बुधबार भएको पहिलो सेमिफाइनलमा धनकुटाको राजारानी क्लबलाई सडन डेथमा १७–१६ गोलअन्तरले पराजित गर्दै एनआरटीले फाइनलमा स्थान सुरक्षित गरेको हो । निर्धारित समय गोलरहित बराबरीमा सकिएसंगै खेल ट्राइब्रेकरमा पुगेको थियो तर ट्राइब्रेकरमा पनि ५–५ गोलको बराबरी भएपछि खेल सडन डेथ तर्फ धकेलिएको हो । ट्राइब्रेकरमा दुवै टोलीबाट १९–१९ प्रहार भएको थियो । खेलको म्यान अफ दि म्याच दुईवटा ट्राइब्रेकर जोगाएका एनआरटीका गोलरक्षक प्रिसो घोषित भए ।
बिहिबार हुने दोस्रो सेमिफाइनल खेल एपिएफ फुटबल क्लब र बागमती युवा क्लब, सर्लाही बीच हुनेछ । माघ २७ गते हुने फाइनल खेलको बिजेताले उपाधि सहित नगद १५ लाख हात पार्नेछ भने उपविजेताले १० लाख प्राप्त गर्नेछ ।