मकवानपुर गोल्डकपको समीफाइनल समीकरण पुरा

२३ माघ, हेटौँडा । हेटौंडामा जारी छैठौं संस्करणको सहिद स्मृति स्थानीय तह अन्तर्राष्ट्रिय फुटबल प्रतियोगिताको सेमिफाइनल समीकरण पुरा भएको छ ।
हेटौंडा ६ स्थित गौरीटार रंगशालामा भएको अन्तिम क्वाटरफाईनल खेलमा थ्रीस्टारलाई एपीएफले ४–० को फराकिलो गोलअन्तरले पराजित गरेसंगै अन्तिम ४ मा पुग्ने टोलीको टुंगो लागेको हो । खेलको पहिलो हाफको इन्जुरी समयमा ऐनसेटको गोलबाट एपीएफले अग्रता लिएको थियो । दोश्रो हाफमा भने एपीएफले ३ गोल गरेको थियो । अनिश महर्जन, प्रदीप लामा र सर्ज सङ्गले १–१ गोल गर्दै एपीएफलाई ४–० को जित दिलाएको हो । यसअघि भएका खेलहरुबाट बिजयी हुँदै न्युरोड टिम एनआरटी, सर्लाहीको बागमती युथ क्लब र धनकुटाको राजारानी क्लबले सेमिफाइनलमा स्थान बनाएको थियो ।
अन्तिम ४ का खेलहरु बुधबारदेखि हुनेछ । बुधबार हुने पहिलो सेमिफाइनल खेल एनआरटी र धनकुटा बीच हुनेछ । त्यसैगरी बिहिबार हुने दोश्रो खेल एपीएफ र बागमती युथ क्लबबीच हुनेछ । जिल्ला फुटबल संघ मकवानपुरको आयोजनामा जारी प्रतियोगिताको विजेताले नगद १५ लाख र उपविजेताले दशलाख रुपैया प्राप्त गर्नेछन् ।