अग्राठे बाल समूहलाई उपाधि

१० पुस, हेटौँडा । हेटोंडा उपमहानगरपालिका वडा नम्बर ७ को आयोजनामा बाल समूह स्तरीय अन्डर–१४ सेभेन ए साइड नकआउट फुटबल प्रतियोगितामा अग्राठे बाल समूह बिजेता बनेको छ ।
नवज्योति खेल मैदानमा मंगलबार भएको फाइनल खेलमा इच्छा जागृत बाल समूहलाई ३–० ले हराउँदै अग्राठे बाल समूहले उपाधि जितेको हो । अग्राठेका साकेत गुरुङको २ गोल र प्रस्तुत बस्नेतको १ गोलमार्फत बिजेता बनेसँगै अग्राठे बाल समूहले दश हजार रुपैयाँ नगद सहित शिल्ड, मेडल तथा प्रमाणपत्र प्राप्त गरेको छ । यसैगरि उपबिजेता इच्छाजागृत बाल समूहले पाँच हजार रुपैयाँ नगद सहित शिल्ड, मेडल तथा प्रमाणपत्र प्राप्त गरेको छ । प्रतियोगितामा प्रतियोगिता अवधिभर सबैभन्दा बढी गोल गर्ने स्मृति किरण बाल समुहका बिबेश लामा, अग्राठे बाल समुहका साकेत गुरुङ, तथा इच्छा जागृत बाल समुहका एलेक्स आचार्य पुरस्कृत भएका छन् ।
पुष ७ गतेदेखि १० गतेसम्म भएको प्रतियोगितामा उत्कृट फरवाड खेलाडीमा इच्छा जागृतका एलेक्स आचार्य, उत्कृष्ट मिडफिल्डरमा इच्छा जागृतकै प्रिन्स दाहाल ,उत्कृष्ट गोलकिपरमा प्रगती बाल समुहका समिप बस्नेत, उत्कृष्ट डिफेन्डरमा नागस्वती बालसमुहका असुम सुवेदी तथा म्यान अफ द सिरिज अग्राठे बालसमुहका साकेत गुरुङ पुरस्कृत भएका छन् ।हेटौंडा उपमहानगरपालिकाका उपप्रमुख राजेश बानियाँको प्रमुख आतिथ्यता तथा वडा नं ७ बाल समूह सञ्जालका अध्यक्ष प्रिन्सप गौतमको सभाध्यक्षता रहेकोे पुरस्कार वितरण कार्यक्रममा वडाका जनप्रतिनिधीहरु तथा वडाका विभिन्न संघ सँस्था लगायत टोल बिकास सँस्थाका प्रतिनिधीहरुको उपस्थिति रहेको थियो । वडा बाल समूह सञ्जाल नागस्वतीको सहकार्य तथा नागडाँडा युवा क्लबको व्यवस्थापनमा भएको प्रतियोगितामा वडाभित्रका बाल समूहहरुका १० वटा टिमले सहभागिता जनाएका थिए ।