भूकम्प पीडितलाई बागमती प्रदेश सरकारको एक करोड ५० लाख रुपैयाँ सहयोग

१८ कार्तिक, हेटौँडा । बागमती प्रदेश सरकारले जाजरकोट र रुकुम पश्चिमका भूकम्प पीडितहरुलाई राहतस्वरूप एक करोड ५० लाख रुपैयाँ सहयोग गर्ने भएको छ ।
बागमती प्रदेश सरकारको आन्तरिक मामिला तथा कानुन मन्त्रालयले शनिबार एक विज्ञप्ति जारी गर्दै भूकम्पबाट प्रभावितको उद्धार, उपचार, राहत र पुनर्स्थापनाका लागि एक करोड ५० लाख रुपैयाँ उपलब्ध गराउने जनाएको हो । यस विपद् घडीमा बागमती प्रदेश सरकार कर्णाली प्रदेश सरकार सँगसँगै रहने भन्दै भूकम्पबाट ज्यान गुमाएका व्यक्तिहरुप्रति भावपूर्ण श्रद्धाञ्जलीका साथै शोकाकुल परिवार र आफन्तजनहरुमा गहिरो संवेदन प्रकट गर्दै घाइतेहरुको शीघ्र स्वास्थ्य लाभको कामना समेत विज्ञप्ति मार्फत गरेको छ ।