गोरखाका दर्जी हेटौंडामा सय किलो गाँजासहित पक्राउ

३१ असार, हेटौँडा । मकवानपुरमा एक सय किलो गाँजासहित एक जना पक्राउ परेका छन् ।
पक्राउ पर्नेमा गोरखा पालुङटार नगरपालिका–३ बस्ने ३७ वर्षीय दुर्गा दर्जी रहेको जिल्ला प्रहरी कार्यालयका प्रहरी प्रवक्ता एवम् प्रहरी नायब उपरीक्षक टेक बहादुर कार्कीले जानकारी दिनुभयो । आइतबार हेटौंडा ४ कर्राबाट दर्जीलाई एक सय किलो ६०० ग्राम गाँजासहित पक्राउ गरिएको प्रहरी प्रवक्ता कार्कीले बताउनुभयो । विशेष सूचनाको आधारमा अस्थायी पोष्ट थानाभञ्ज्याङबाट प्रहरीको टोली खटिएको थियो। त्यसक्रममा हेटौंडाबाट पथलैया जाँदै गरेको बागमती प्रदेश ०३–००१ च १६८८ नं. को बोलेरो पिकअप गाडी प्रहरीले चेक गरेको थियो । उक्त गाडी पछाडि बोराभित्र लुकाइएको अवस्थामा गाँजा फेला परेको हो । गाँजा फेला परेपछि प्रहरीले दर्जीलाई पक्राउ गरेको हो।प्रहरीले यस सम्बन्धी थप अनुसन्धान अघि बढाएको छ ।