फ्रेण्ड्समाथि हिमालयन शेर्पाको जीत, सेमिफाइनल समीकरण पुरा

६ फागुन, हेटौंडा । हेटौंडामा जारी ५ औं संस्करणको स्थानीय तह सहिद स्मृति अन्तर्राष्ट्रिय फुटबल प्रतियोगितामा सेमिफाइनल समीकरण पुरा भएको छ ।
हेटौंडा ५ स्थित पिप्ले क्याम्पा रंगशालामा शनिबार भएको खेलमा हिमालयन शेर्पा बिजयी भएसंगै अन्तिम ४ मा पुग्ने टोलीको टुंगो लागेको हो । फ्रेण्ड्स क्लबलाई २–१ ले हराउँदै हिमालयन शेर्पाले अन्तिम ४ मा स्थान सुरक्षित गरेको हो । खेलको पहिलो हाफ गोलरहित बराबरीमा सकिएको थियो । दोश्रो हाफको तेश्रो मिनेटमै हिमालयन शेर्पाले अमृत श्रेष्ठको गोलबाट अग्रता लिएको थियो । यता फ्रेण्ड्सका एन्जल महर्जनले दोश्रो हाफको २३ औं मिनेटमा गोल गर्दै खेललाई बराबरीमा ल्याएका थिए तर ३६ औं मिनेटमा हिमालयन शेर्पाका विश्वास श्रेष्ठले गोल गर्दै टोलीलाई जित दिलाएका हुन् । यसअघि भएका खेलहरुबाट एपीएफ क्लब, मनाङ मस्र्याङग्दी, एफसी क्यामरुन सेमिफाइनलमा प्रवेश गरिसकेको छ । सेमिफाइनलका खेलहरु आइतबारदेखि सुरु हुनेछ । पहिलो सेमिफाइनल खेल एपीएफ र मनाङ मस्र्याङग्दी बीच हुनेछ । यस्तै सोमबार हुने दोश्रो सेमिफाइनल खेल एफसी क्यामरुन र हिमालयन शेर्पाबीच हुनेछ । प्रतियोगिताको फाइनल खेलमा फागुन १० गते हुनेछ । प्रतियोगिताको उपाधि विजेता टोलीले नगद १५ लाख र उपविजेता टोलीले १० लाख रुपैयाँ सहित शिल्ड, मेडल तथा प्रमाणपत्र प्राप्त गर्ने छन् ।