राज्यबाट इमान्दार राष्ट्रसेवक कर्मचारीलाई हतोत्साहित गर्ने काम भयोः कुलमान घिसिङ

२२ चैत्र, काठमाडौँ । नेपाल विद्युत प्राधिकरणका निवर्तमान कार्यकारी निर्देशक कुलमान घिसिङले सरकारले आफूलाई अपमान गरेर हटाएको आरोप लगाउनुभएको छ ।
राज्यले इमान्दार राष्ट्रसेवक कर्मचारीलाई हतोत्साहित र अपमानित गरेको उहाँले बताउनुभयो । सरकारले नेपाल विद्युत प्राधिकरणको कार्यकारी निर्देशकबाट हटाएपछि शुक्रवार काठमाडौंमा पत्रकार सम्मेलन गर्दै उहाँले नेपालको कानुूनले तोकिए अनुसार राष्ट्रसेवामा खटिएको कर्मचारीलाई राज्यको सम्पूर्ण शक्ति खनिएको जिकिर गर्नुभयो । उहाँले आफूलाई अपमान गर्न सरकारका जिम्मेबार व्यक्तिले सार्वभौम संसदको दुरुपयोग गरेको बताउनु भयो । उहाँले आफूले पदमा बस्दा गरेको कुनैपनि कामबाट पछुतो गर्नुपर्ने स्थान नभएको बताउनु भयो । पदीय दायित्वमा रहँदा अवसर र अधिकारलाई सदुपयोग गर्न आफूले समय खेर नफालेको घिसिङको भनाइ छ ।
निःवर्तमान कार्यकारी निर्देशक घिसिङले निरन्तर घाटामा गएको विद्युत प्राधिकरणलाई आफ्नो नेतृत्वमा अर्बौं नाफामा लैजान सफल भएको दाबी गर्नुभयो ।
उहाँले प्राधिकरणको सम्पती तीन गुणाले वृद्धि गरी प्राधिकरणलाई आत्मनिर्भर बनाएको बताउनु भयो । अधिकांश नागरिको घरघरमा बिजुली सेवा उपलब्ध गराउनु आफ्नो कार्यकालको सबैभन्दा ठूलो उपलब्धि भएको उहाँको भनाइ छ ।
निःवर्तमान कार्यकारी निर्देशक घिसिङले देशमा लोडसेडिङको अन्त्यदेखि प्राधिकरणलाई नाफामा लैजानेसम्मका कार्य इमान्दारीपूर्वक गरेको बताउनुभयो । जवाफदेखिता तथा नतिजामुखी नेतृत्वका कारण आफूले सफलता प्राप्त गरेको उहाँको भनाइ छ ।