गणतन्त्रवादीहरुले काम गर्न नसक्दा प्रतिगामी तत्व सल्बलायोः अध्यक्ष दाहाल

१५ चैत्र, काठमाडौँ । नेकपा (माओवादी केन्द्र) का अध्यक्ष पुष्पकमल दाहालले जनअपेक्षा अनुसार गणतन्त्रवादीहरुले काम गर्न नसक्दा प्रतिगामी तत्व सल्बलाएको बताउनुभएको छ ।
समाजवादी मोर्चाले गणतन्त्रको पक्षमा शुक्रवार काठमाडौं गरेको आमसभालाई सम्बोधन गर्दै पूर्वप्रधानमन्त्री समेत रहनुभएका अध्यक्ष दालालले जनचाहानाअनुसार काम गर्न नसकेकै कारण प्रतिगामी तत्वहरु सक्रिय भएको भन्दै आत्मआलोचना र आत्मसमिक्षा गर्नुभयो ।
उहाँले विगतका गल्तीबाट पाठ सिक्दै जनता, शहीद परिवार, बेपत्ता योद्धा परिवार, घाइते र बेपत्ता पारिएका परिवारका सपना पूरा गर्ने भन्दै अर्को क्रान्तीको घोषणा गर्नुभयो । अध्यक्ष दाहालले पूर्वराजा ज्ञानेन्द्र शाहलाई विगतमा धेरै गल्ती गरिसकेकाले फेरि अर्को गल्ती नगर्न चेतावनी दिनुभयो । नेपाललाई २४० वर्षसम्म संसारको सबैभन्दा गरिब देश बनाउनेहरुलाई नेपाली जनताले छुट नदिने समेत उहाँको दाबी छ ।
यसैगरी नेकपा (एकीकृत समाजवादी) का अध्यक्ष माधवकुमार नेपालले देशमा वंशको शासन फर्काउन खोज्नेहरुले ठूलो मूल्य चुकाउनुपर्ने बताउनुभयो । उहाँले सार्वभौमसत्ता सम्पन्न नेपाली जनताले फेरि राजतन्त्र स्वीकार नगर्ने पनि जिकिर गर्नुभयो । २ सय ४० वर्षको शाह वंशको शासन र १०४ वर्षको राणा शासनले नेपाली जनतालाई दास बनाएको भन्दै उहाँले अब नेपाली जनताले कसैको दासता स्वीकार नगर्ने उहाँले बताउनु भयो । अध्यक्ष नेपालले राजतन्त्रले देशको हितमा कहिल्यै काम नगरेको जिकिर गर्नुभयो ।
त्यस्तै नेपाल कम्युनिष्ट पार्टी (नेकपा) का महासचिव नेत्रविक्रम चन्दले राजावादीहरुलाई लक्षित गर्दै नेपाली जनतालाई प्रभुहरुको खाँचो नभएको टिप्पणी गर्नुभयो । उहाँले केही तत्वहरु गणतन्त्र उल्ट्याउने प्रयासमा रहेको भन्दै जनतालाई प्रभुहरुको खाँचो नभएको बताउनुभयो । नागरिकका सबै चाहानाहरु पुरा हुन नसके पनि जनताले गणतन्त्रप्रति गौरव गरिरहेको उहाँको भनाइ छ । उहाँले जनतासँग हारेर सत्ता गुमाएका तत्वहरु विदेशीको उत्साहटमा गाण्तन्त्रको विरुद्धमा षड्यन्त्र गरिरहेको बताउनु भयो ।
महासचिव चन्दले गणतन्त्रको पक्षमा लडेका नागरिकहरु अधिकार सम्पन्न भइनसकेका कारण आफूहरु अगाडि बढ्न खोजिरहेको बताउनु भयो ।