महायज्ञको तयारी पुरा

१५ चैत्र, हेटौँडा । हेटौंडा उपमहानगरपालिका वडा नंं ९ स्थित मानव सेवा आश्रमले गर्न लागेको श्रीमद् भागवत् सप्ताह ज्ञान महायज्ञको सम्पूर्ण तयारी पुरा भएको छ ।
शुक्रबार कार्यालयमा पत्रकार सम्मेलन गर्दै चैत्र १७ गतेदेखि २४ गतेसम्म हुने महायज्ञको सम्पूर्ण तयारी पुरा भएको जानकारी दिएको हो । आश्रमको मुख्य कार्यालयको प्राङगणमा हुने महायज्ञमा भागवत भाष्कर कमलनयन गौतमबाट कथा प्रवचन हुने आश्रमका संस्थापक अध्यक्ष रामजी अधिकारीले जानकारी दिनुभयो ।
आश्रमको क्षमता अभिवृद्धि र आश्रम व्यवस्थापनलाई थप सहज बनाउन महायज्ञ गर्न लागिएको उहाँले बताउनुभयो । महायज्ञबाट उठेको रकमबाट १० करोडको अक्षयकोष स्थापना गरिने बताइएको छ । २०८२ सालभित्र सहयोगापेक्षी सडकआश्रित मानवमुक्त राष्ट्र नेपाल निर्माणको संकल्पलाई पुरा गर्नको लागि समेत आधार तयार पार्न महायज्ञले सहयोग पु¥याउने उहाँको भनाई छ ।
महायज्ञको पहिलो दिन चैत्र १७ गते बिहान ७ः३० बजेदेखि कृष्माण्ड सरोबर त्रिवेणीधामबाट बाजागाजा सहित कलश यात्रा निकालिने संरक्षक अधिकारीले जानकारी दिनुभयो । महायज्ञको समुद्घाटन बिहान ९ बजे बागमती प्रदेशका मुख्यमन्त्री बहादुर सिंह लामाले गर्नुहुने छ । त्यसैगरी चैत्र १८ गतेदेखि २४ गतेसम्म निःशुल्क योग शिविर समेत सञ्चालन हुनेछ । हेटौंडामा हुन लागेको यो महायज्ञ १० औं हो ।
यसअघि आश्रमले चितवन, लमजुङ, पोखरा, बुटवल, दाङ, सुर्खेत, बुटवल, धनगढी र सर्लाहीमा महायज्ञ गरिसकेको छ । हेटौंडा स्थित कार्यालयले हालसम्म १ हजार ७ सय ९६ जनाको उद्धार गरिसकेको छ भने २ सय ३८ जना अझै पनि आश्रित छन् ।