प्रदेश सरकारको सफलता मुख्यन्यायधिवक्ता कार्यालयको सफलतामा निर्भर रहन्छः मुख्यमन्त्री लामा

१२ चैत्र, हेटौँडा । बागमती प्रदेशका मुख्यमन्त्री बहादुर सिंह लामाले सरकारको सल्लाहकारको रुपमा मुख्यन्यायधिवक्ता कार्यालयले उल्लेख्यि कार्य गरेको बताउनुभएको छ ।
प्रदेश सरकारले बनाएका कानुनहरुलाई सुव्यवस्थित गर्न मुख्यन्यायधिवक्ता कार्यालयको महत्वपूर्ण भुमिका रहेको उहाँले बताउनुभयो । सातौं स्थापना दिवसको अवसरमा कार्यालयले मंगलबार हेटौंडामा आयोजना गरेको कार्यक्रममा बोल्नुहुँदै मुख्यमन्त्री लामाले विकास निर्माणको क्रममा आउने कानुनी अड्चनको सामना गर्न समेत कार्यालयले सहयोग पु¥याएको बताउनुभयो ।
प्रदेश सरकारलाई आवश्यक कानुन निर्माणको प्रक्रियालाई सहज बनाएको भन्दै उहाँले कार्यालयको प्रशंसा समेत गर्नुभयो । प्रदेश सरकारको सफलता नै मुख्यन्यायधिवक्ता कार्यालयको सफलतामा निर्भर रहने उहाँको बुझाई छ । मुख्यमन्त्री लामाले कार्यालयको बारे सर्वसाधारणमा रहेको गलत बुझाईलाई अन्त्य गर्नुपर्नेमा जोड दिनुभयो ।
यसैगरी कार्यक्रममा बोल्नुहुँदै आन्तरिक मामिला तथा कानुन मन्त्री सुरजचन्द्र लामिछानेले संघीयताको प्रभावकारी कार्यान्वयनको लागि मुख्यन्यायधिवक्ता कार्यालय बलियो हुनुपर्ने बताउनुभयो । लोकतान्त्रिक मुल्य र मान्यतामा कानुनी राज्य र शासनको ठुलो महत्व रहेको उहाँको भनाई छ । मन्त्री लामिछानेले सातै प्रदेशका मुख्य न्यायधिवक्ताहरुको सम्मेलनबाट जारी भएको घोषणापत्र कार्यान्वयन गर्नुपर्नेमा सबै पक्ष जिम्मेवार बन्नुपर्ने बताउनुभयो ।
कार्यक्रममा मुख्यन्यायधिवक्ता शुकदेव काफ्लेले अदालतमा प्रदेश सरकारको प्रतिरक्षा गरिरहँदा सरकारले गरेका निर्णयहरुको यथेष्ट आधार र कारण उपलब्ध गराउन आग्रह गर्नुभयो ।

स्थापना दिवसकै अवसरमा कार्यालयले चैत्र ११ गते आयोजना गरिएको अन्तर उच्च माध्यमिक विद्यालय स्तरीय हाजिरीजवाफ प्रतियोगितामा प्रथम, द्धितिय र तृतीय स्थान हासिल गर्ने सहभागीलाई पुरस्कार प्रदान समेत गरिएको थियो । प्रतियोगितामा आधुनिक राष्ट्रिय माध्यामिक विद्यालयका भीम प्रसाद शर्मा र आरोही पाल अधिकारीको समूह प्रथम भएको थियो । प्रथम हुनेले नगद १५ हजार रुपैयाँ सहित प्रमाणपत्र प्राप्त गरेका छन् । त्यस्तै, हेटौंडा क्याम्पसका सुशिला तामाङ र रमा भण्डारीको समूह दोस्रो हुँदा जनज्योति माविका काजल थापा र सचिन बजु तेस्रो हुन सफल रहे ।
दोस्रो र तेस्रो हुने समूहले क्रमशः नगद १० हजार र सात हजार पाएका छन् । उत्कृष्ट कार्यसम्पादन गरेवापत मुख्य न्याधिवक्ता कार्यालयका सहायक न्यायधिवक्ता राजेन्द्रमणी पोखरेललाई नगद पाँच हजार रुपैया सहित सम्मान गरिएको थियो ।