पशुपति मन्दिरमा निर्माण गरिएको अतिथि सदनको उद्घाटन

१२ चैत्र, हेटौँडा । हेटौँंडा उपमहानगरपालिका वडा नं. ४ स्थित पशुपति मन्दिरमा निर्माण गरिएको भुवनेश्वर अतिथि सदनको मंगलबार उद्घाटन गरिएको छ ।
बागमती प्रदेशसभा सदस्य एवम् पूर्व खानेपानी मन्त्री एकालाल श्रेष्ठले मन्दिर परिसरमा रहेको ३ कोठे अतिथि सदनको उद्घाटन गर्नुभएको हो । २२ लाख २३ हजार लागतमा अतिथि सदन निर्माण गरिएको हो । बागमती प्रदेशको संस्कृति तथा पर्यटन मन्त्रालयबाट प्राप्त २० लाख र भुवेनश्वर मन्दिर सेवा समितिको २ लाख २३ हजार सहयोगमा सदन निर्माण गरिएको हो । कार्यक्रममा बोल्नुहुँदै प्रदेशसभा सदस्य श्रेष्ठले पशुपति मन्दिरमा नयाँ संरचना निर्माण भन्दा पनि भएका संरचनाहरुलाई व्यवस्थित ढंगले सञ्चालन गर्नुपर्ने बताउनुभयो । बाहिरी जिल्लाबाट आएका दशनार्थीहरुको लागि आवास निर्माण गर्ने आफुहरुको लक्ष्य पुरा भएको उहाँको भनाई छ ।

पछिल्लो समय मकवानपुरमा धेरै धार्मिक पर्यटकहरुको आगमन बढिरहेको उहाँले बताउनुभयो । प्रदेश सभा सदस्य श्रेष्ठले धार्मिक कार्यहरुलाई व्यवस्थित ढंगले सञ्चालन गर्न ठोस कार्ययोजना बनाउन समेत आग्रह गर्नुभयो । औद्योगिक नगरीको रुपमा चिनिएको हेटौंडालाई धार्मिक पर्यटकीय क्षेत्रको रुपमा समेत चिनाउन प्रदेश सरकार, स्थानीय तह लगायत नागरिक समाज एकजुट हुनुपर्नेमा समेत उहाँले जोड दिनुभयो ।

भुवनेश्वर सेवा समितिका वरिष्ठ उपाध्यक्ष तेज प्रसाद रुपाखेतीको सभाध्यक्षतामा भएको कार्यक्रममा पर्यटन विकास आयोजना बागमती प्रदेशका कार्यालय प्रमुख रोशन कुमार श्रीवास्तव लगायतको आतिथ्यता रहेको थियो ।