राजनीतिक पूर्वाग्रह राखेर प्रतिष्ठानको विरोध भइरहेको छः पूर्व मुख्यमन्त्री पौडेल

९ चैत्र, हेटौँडा । बागमती प्रदेशका प्रथम मुख्यमन्त्री डोरमणि पौडेलले राजनीतिक पूर्वाग्रह राखेर केही तत्वहरुले मदन भण्डारी स्वास्थ्य विज्ञान प्रतिष्ठानको विरोध गरेको बताउनुभएको छ ।
नेकपा एमाले निकट राष्ट्रिय स्वास्थ्यकर्मी महासंघ, नेपाल जिल्ला समिति मकवानपुरको चौथो अधिवेशनको उद्घाटन सत्रमा बोल्नुहुँदै उहाँले केही व्यक्तिहरुको निजी स्वार्थको कारण अहिले प्रतिष्ठानको विरोध भइरहेको जिकिर गर्नुभयो । विगत देखि हेटौंडा अस्पतालमा भइरहेको चलखेल अन्त्य हुने डरले केही तत्वहरु प्रतिष्ठानको बिरुद्धमा लागेको उहाँको धारणा छ ।
कतिपय चिकित्सकहरुले पनि आफुलाई प्रतिष्ठानको कर्मचारी भन्न नसकेकोमा समेत उहाँले असन्तुष्टि व्यक्त गर्नुभयो । प्रतिष्ठानबाट सेवा सुविधा लिएर प्रतिष्ठानको कर्मचारी हो भन्न नसक्नेले तत्काल राजीनामा दिन पनि उहाँले सुझाव दिनुभयो ।
फरक प्रसंगमा पूर्व मुख्यमन्त्री पौडेलले एमालेको नेतृत्वमा सरकार बन्दा मात्र परिवर्तनको संकेतहरु देखापर्ने बताउनुभयो तर राजनीतिक नेतृत्वको चाहानामा मात्रै काम गर्न नसकिने उहाँको बुझाई छ । ज्ञानेन्द्रकालिन ब्युरोक्रेसीको चिन्तन र मानसिकताको कारण अहिलेको नेतृत्वले काम गर्न सक्ने अवस्था नरहेको उहाँको भनाई छ ।
पूर्व मुख्यमन्त्री पौडेलले आफ्नो नेतृत्वको सरकारले ४२ महिनामा गरेको काम अबको ४२ वर्षमा पनि हुन नसक्ने दाबी गर्नुभयो । प्रदेश राजधानीमै सरकार र मन्त्रीहरुलाई भेट्न मुश्किल भएको उहाँले बताउनुभयो ।
पूर्व मुख्यमन्त्री पौडेलले स्वास्थ्यकर्मीको सानो त्रुटिबाट पनि गम्भीर घटना हुन सक्ने भएकोले जिम्मेवार भएर काममा लाग्नुपर्नेमा जोड दिनुभयो । अधिवेशनले नँया कार्यसमिति समेत चयन गरेको छ ।
आगामी नेतृत्वका लागि स्वास्थ्यकर्मी संघको अध्यक्षमा उत्सव चौंलागाईं सर्वसम्मत चयन भएका छन् । त्यस्तै उपाध्यक्षमा लक्ष्मी पौडेल, सानी मोक्तान, सचिवमा हिरा तामाङ्, कोषाध्यक्षमा समाधि बल, उपसचिवमा सविता पौडेलसहित १५ सदस्यीय टोलि चयन भएका छन् ।