दुर्घटनापछिको जीवनः

सोफी (नाम परिवर्तन) ले आफ्नो जीवनमा एक दर्दनाक घटना सामना गरिन्। त्यो घटनाले उनको जीवनलाई पूर्ण रूपमा परिवर्तन गर्यो । उक्त घटना बिर्तामोडमा भयो जब उनी आफ्ना साथी संग बाइकमा यात्रा गरिरहेकी थिइन् र उनीहरू स्कुटरसँग ठोक्किए । मंसिर ५, २०७७ मा उनले आफ्ना साथीको जीवन गुमाइन्, तर भाग्यवश, सोफीलाई छिट्टै अस्पताल लगियो । उनले विभिन्न उपचारहरू गरिन् र कुनै गरी जीवनको यो कठिन लडाइँ जित्न सकिन् । उनको हातको शल्यक्रिया गरिएको थियो र उनको मस्तिष्कमा रगतको थोप्लो जमेको थियो । उनी भन्छिन्, “दुर्घटनापछि मेरो जीवनले सोच्ने तरिका नै परिवर्तन गरिदियो।“
सोफी आफ्नो परिवारकी एक्ली छोरी थिइन् र उनलाई सबैले धेरै माया गर्थे। उनको परिवारमा कहिल्यै “तिमी केटी हौ, सिमित भएर बस्नुपर्छ“ भन्ने मानसिकता थिएन । तर दुर्घटनापछि, उनलाई समाजले दोषी देख्न थाल्यो । उनका आमाबुवाका अनुसार, “समाजका मानिसहरू यति निर्दयी थिए कि उनले अर्को व्यक्तिको मृत्यु गराइन् भनेर उनलाई दोष दिए । केहीले त उनलाई शापित नै भने।“ यी कुराहरूले उनका आमाबुवा निकै दुखी भए ।
सोफीलाई यस्तो कुराहरू सुन्दा मानसिक रूपमा निकै असर पर्यो। जीवन चल्दै जानुपर्छ, तर जब उनले त्यस्तै बाइक वा उस्तै व्यक्तिलाई देख्छिन्, उनको अतीतको सबै तस्बिर उनको आँखामा झल्झली आउँछ । जति नै बलियो हुन खोजे पनि, केही क्षणहरूमा उनी आफ्नो अस्तित्वलाई नै प्रश्न गर्न थाल्छिन् ।
त्यस घटनाले गर्दा, सोफी अरूको खुसीलाई प्राथमिकता दिन थालेकी छिन्, जसले उनलाई भित्रभित्रै कमजोर बनाइरहेको छ । उनी भन्छिन्, “कहिल्यै सोचेकी थिइनँ कि केटी भएर जन्मिनु नै अभिशाप जस्तो हुने रहेछ । समाजको दृष्टिकोण यति घिनलाग्दो हुन्छ कि आफूलाई नै बेकार महसुस गराउन थाल्छ।“ जति नै बलियो भए पनि, मानिसहरूले तिमीलाई सधैं अतीत सम्झाइरहन्छन् र कमजोर बनाइरहन्छन् । सोफीलाई आफ्नो भावनाहरू व्यक्त गर्न गाह्रो हुन्छ किनभने उनलाई कहिल्यै कसैले सुनेन, केवल न्याय गरे । अब, उनले महसुस गरेकी छिन् कि सबै मानिसहरू मनकारी हुँदैनन्। उनी सबैप्रति चिसो व्यवहार गर्न थालेकी छिन्। जीवनले उनलाई सिकाएको छ कि कसैमा भरोसा गर्नु हुँदैन, किनभने कोही कुन उद्देश्यले तिमी नजिक आउँछ भन्ने थाहा हुँदैन । दुर्घटनापछि उनले धेरै मानिसहरू भेटिन्, जसले सुरुमा साथ दिने नाटक गरे, तर सबभन्दा कठिन समयमा छोडेर गए ।
उनलाई शारीरिक रूपमा समेत अपमान गरियो, जसले उनलाई आफ्नै शरीरमा असहज महसुस गरायो । यी सबै घटनाले उनलाई अझै बलियो बनायो र अब उनी उत्कृष्ट व्यक्तित्वकी स्वामिनी भएकी छिन् । उनलाई कसैलाई गुमाउनुको डर छैन।सोफी अरूका लागि सधैं उभिन्छिन्, तर आफैंका लागि कसैलाई उभिन दिँदिनन् । एकपटक भरोसा टुटेपछि, फेरि कसैमा विश्वास गर्न गाह्रो हुन्छ । उनलाई लाग्छ कि उनी अरूलाई बुझ्न सक्छिन्, तर आफूलाई सधैं गलत बुझिन्छ ।
उनी भन्छिन्, “म धेरै संवेदनशील हृदयकी छु, र त्यो ठीक छ । संवेदनशील हृदय हुनु आशीर्वाद पनि हो, श्राप पनि। तिमी सधैं सबैका लागि नरम हृदय राख्नेछौ, यहाँसम्म कि तिमीलाई दुःख दिनेहरूप्रति पनि तिमी सधैं अरूको आवश्यकता आफ्नो भन्दा अगाडि राख्नेछौ । यदि कसैले तिम्रो आलोचना गर्यो भने, तिमी सधैं आफ्नो मूल्यबारे प्रश्न गर्नेछौ। तिमी सधैं सोच्नेछौ कि अरूका लागि तिमी पर्याप्त छैनौ । र त्यो महसुस गर्नु पनि ठीकै हो। संवेदनशील हृदयलाई सम्हाल्न सबै सक्षम हुँदैनन् । तिमी दुर्लभ छौ र बलियो पनि। आफूलाई अरूमा फिट गराउन कहिल्यै आफ्नो वास्तविकता त्याग्नु हुँदैन।“