३१ किलो गाँजा र ६ किलो अफिम सहित मकवानपुर प्रहरीद्वारा १ जना पक्राउ

स्वर्णिम खबर
१५ फाल्गुन २०८१, बिहीबार १९:११

१५ फागुन, हेटौँडा । मकवानपुर प्रहरीले गाँजा र अफिमसहित एक जना सवारी चालकलाई पक्राउ गरेको छ ।
इलाका प्रहरी कार्यालय मनहरी र प्रहरीचौकी सुनाचुरी मकवानपुरबाट खटिएको संयुक्त प्रहरी टोलीले जिल्ला मकवानपुर मनहरी–६, नयाँबस्तीस्थित पूर्वपश्चिम राजमार्ग सडकखण्डमा साइड लगाएर राखेको बा.७ च ७०१८ नम्बरको जीपलाई शंका लागेर जाँच्दा अवैध लागूऔषध अफिम र गाँजा नियन्त्रणमा लिएको थियो ।
जीपबाट गाँजा ३१ किलो ५६० ग्राम., अफिम ६ किलो १६० ग्राम र गाँजाको धुलो (पोल्यान्ड) १२७ किलो ९४० ग्राम फेला परेको जिल्ला प्रहरी कार्यालय मकवानपुरका प्रहरी नायब उपरीक्षक तथा प्रवक्ता श्यामु अर्यालले जानकारी दिनुभयो ।
प्रहरीले लागूऔषध तथा जीपसमेत नियन्त्रणमा लिएपनि तत्काल फागुन १० गतेदेखि फरार रहेका जीप चालकको खोजतलास तथा अनुसन्धानको क्रममा सिन्धुपाल्चोक बाह्रबिसे नगरपालिका–९ घर भइ हाल काठमाडौं–१३, पेप्सीकोला बस्ने ३८ वर्षीय लालबहादुर तामाङलाई पक्राउ गरी बिहीबार सार्वजनिक गरिएको हो ।
मकवानपुर प्रहरीले काठमाडौं उपत्यका अपराध अनुसन्धान कार्यालय टेकुसँगको समन्वयमा काठमाडौं गोकर्णेश्वर–४, जोरपाटीबाट उनलाई पक्राउ गरेको थियो । इलाका प्रहरी कार्यालय मनहरीबाट यस विषयको अनुसन्धान भइरहेको उपरीक्षक अर्यालले जानकारी दिए ।

प्रतिक्रिया लेख्नुहोस्

  • प्रतिक्रियाहरु