पुस मसान्त सम्म हेटौंडा बचतको कुल बचत ५७ करोड

२ फागुन, हेटौँडा । हेटौंडा ७ नागश्वतीमा मुख्य कार्यालय रहेको हेटौडा बचत तथा ऋण सहकारी संस्थाले अर्धवार्षिक समिक्षा गोष्ठी तथा अन्तरक्रिया कार्यक्रम सम्पन्न गरेको छ ।
कार्यक्रममा संस्थाका व्यवस्थापक रामशरण गौतमले संस्थाले आर्थिक वर्ष २०८१÷८२ को श्रावण देखि पौष मसान्तसम्मको वित्तीय विवरण सहित संस्थाको कार्ययोजना तथा प्रगति अवस्थाको बारेमा प्रस्तूतिकरण राख्नुभएको थियो । व्यवस्थापक गौतमको प्रस्तूतीकरण अनुसार पौष मसान्त सम्म संस्थाको कुल शेयर पूँजी ४ करोड ८४ लाख ९६ हजार रहेको छ । संस्थाको कुल बचत ५७ करोड ३ लाख ८२ हजार, ऋण लगानी ५५ करोड १२ लाख ७ हजार रहेको व्यवस्थापक गौतमले बताउनुभयो ।
६ महिनाको अवधिमा संस्थाले कुल बजेटको २९ दशमलव ६५ प्रतिशत उपलब्धी हासिल गरेको उहाँले जानकारी दिनुभयो । यस आर्थिक वर्षका लागि संस्थाको कुल बजेट १ अर्ब ९१ करोड २४ लाख रहेको छ । १३ जना सदस्यतथा सदस्यको परिवारलाई ४५ हजार ७ सय दुर्घटना खर्च वितरण गरेको बताइएको छ ।
यस अवधिमा १ जना सदस्य तथा सदस्यको परिवारलाई दश हजार घातक रोग उपचार खर्च प्रदान गर्नुका साथै ३५ जना सुत्केरीलाई ७० हजार पोषण खर्च प्रदान लगायतका कार्यक्रम गरिएको संस्थाको प्रगति विवरणमा जनाइएको छ ।
कार्यक्रममा सहभागीहरुले स्वीकृत कार्यक्रम समयमै सम्पन्न गर्न, नियमित बचत तथा कर्जा असुलि गर्न, वार्षिक लक्ष्य अनुसारको रणनीति बनाएर कार्य गर्न सुझाव दिएका थिए । संस्थाका अध्यक्ष इन्द्रबहादुर बस्नेतको अध्यक्षतामा भएको कार्यक्रममा उपाध्यक्ष विजयबहादुर बस्नेत, विभिन्न समिति तथा उपसमितिका संयोजक, सदस्य र कर्मचारीको उपस्थिति रहेको थियो ।
संस्थाको कुल सदस्य संख्या ७ हजार १ सय ८० रहेको छ । कार्यक्रममा जिल्ला बचत संघ लिमिटेड द्धारा आयोजित हाजिरी जवाफ प्रतियोगितामा संस्थालाई दोस्रो स्थान हासिल गर्न सफल बनाउने सहभागीलाई प्रशंसापत्र र नगद सहित सम्मान गरिएको थियो ।