मउवा संघ निर्वाचनः उद्योग तर्फको उपाध्यक्ष पदमा रविन्द्र घिमिरेको उम्मेदवारी

१९ पुस, हेटौँडा । यही पौष २७ गते हुन गइरहेको मकवानपुर उद्योग वाणिज्य संघको निर्वाचनमा उद्योग तर्फको उपाध्यक्ष पदमा रविन्द्र घिमिरेले आफ्नो उम्मेदवारी घोषणा गर्नुभएको छ ।
उद्योग तर्फको उपाध्यक्ष पदका उम्मेदवार घिमिरेले शुक्रबार पत्रकार सम्मेलनको आयोजना गर्दे अनिल अग्रवालको प्यानलबाट आफूले उम्मेदवारी दिने तयारी गरेको बताउनुभयो । आफ्नो उम्मेदवारी फिर्ता लिनका लागि नभई निर्वाचनमा विजयी हुनका लागि रहेको उहाँले बताउनुभयो ।
विगतको निर्वाचनमा थोरै मतान्तरले पराजित हुनुभएको घिमिरेले आफू सधैं व्यवसायीको हकहितको पक्षमा निरन्तर लागि रहेको बताउनुभयो । उद्योग तर्फबाट दिपक शिवाकोटी, राजकुमार बानियाँ, कृष्णगोपाल महर्जन, महिला सदस्यमा मेनका श्रेष्ठ उम्मेद्वार रहेका छन् ।
करीब ३० वर्षदेखि व्यवसायिक क्षेत्रमा सक्रिय घिमिरे हेटौंडा उपमहानगरपालिकाको नगर खेलकुद विकास समितिका अध्यक्ष समेत रहनुभएको छ । मकवानपुर उद्योग वाणिज्य संघको अधिवेशन पौष २४ गतेदेखि २७ गतेसम्म हुँदैछ ।